خوارز نام خطا سلطاننك اوزرينه هجوم ايلدى و خطا عسكرينى طابيه ياپمغه يا خود مهمات عربه‌لرينى اطرافلرينه حصار ايدنمكه قوميوب خطا عسكرى ميدانده ايكن عظيم جنك و جدال و حرب و قتال ايدوب بعنايت الملك المتعال خان خطايى اسير و دستكير ايدرك طوتوب مملكتنه كتدى و اول دريا كبى لشكر خطابى سر و پا قلدى زيرا جنك قانوننده قاچمق ايله اولمك بردر مثلا اكر يوزبيك نفر حربدن قاچسه جمله سنك بونينى اوررلر و قانونلرنده شويله مسطوردر كه ولايتلرندن بر حصير مقدارى بير دشمن الور الور ايسه انك اوزرنده جميع عسكر هلاك اولمق كركدر بعده امير اسن تيشى خاقان چينى صحراى قلماقده قراقويم نامنده اولان شهر معتبره كتوروب خطا پادشاهنى انده اولان بازركان معتبرانه سزلر شهر نشينلر سز و سز شهرلريمزك ايچنى بزدن ايو بيلور سزديوب انلره تسليم ايلدى انلر دخى خان خطايى انواع عزت و حرمت ايله پرورش ايدرك تخت مثالى بر مسند ترتيب ايدوب و رنكارنك لباس فاخره‌لر كيديروب هرگون گوناگون اطعمه‌لر ايله ضيافت ايده‌رك بر مدت كچدكد نصكره بر كون مذكور پادشاه با عدل و داد خان خطايه قزين ويروب داماد ايلدى و بعده ملك خطانك وزراى اعظم و امراى محتشم و رؤساى عزيز و محترملرينه رسول ارسال ايلديكه بن خاقانى اوغللوغه قبول ايدوب و قيزمى اكا ويروب كنديمه يقين ايلدم و شمدى مرادم بودر كه انى ينه سزه كوندره‌يم سز دخى كماكان پادشاهلغنى تسليم ايدوب تاج و تختنى مقرر قيلوب اطاعت ايده سز وزرا و امراء چين بو خبرى ايشتد كلرنده جواب ايتديلر كه بزانى شمدنكر و پادشاهلغه قبول ايتمزز زيرا بخت بركشته در اگر طالعى سعد اوزره اوليدى بويله دولتدن دوشوب اسير و افتاده اولمزدى حالا بز قانون و قاعده‌مى اوزره صاحب سعادتلردن برينى پادشاهلغه قبول ايدوب اطاعت ايتدك ديونامه‌يى پادشاه قلماقه كوندر ديلر امير دخى بوجوابى ايشيديجك زياده غضبه كلوب خطاييلره خبر كوندرديكه حاضر اولك كه واردم انشاء الله تعالى اكر حق تعالى بكا فرصت و نصرت ويررسه جزا و سزاكزى كوررسز ديوانها ايديجك وزرا و امراء خطا بو خبرى ايشيديجك سابقا واقع اولان حرب مقاتله‌يى ملاحظه ايدوب بو شديد دن غايت ترسان و لرزان اولديلر بعد ازان وزرا و امرا و سائر صبائد تدبير مشاورت ايدوب كندولرى نصب ايتدكلرى پادشاهى دفع و رفع ايتمك صدرنده اولديلر و حيله و خدعه ايدوب خاقانه عرض و اعلام ايلديلركه درون سرايده در دنجى قلعه ده اولان باغده بر نگارخانهء بهشت اسا